Breaking

June 9, 2020

အစ္စရေးအတွက်…သတင်းရောင်းပေးခဲ့ကြသော…ဆီးရီးယားသူလျှိူများအကြောင်း

ဆီးရီးယားတွင် မွေးဖွားကြီးပြင်းလာသူ မာဂျစ်သည် စိတ်ကူးယဉ်အိပ်မက် တစ်ခုရှိသည်။ တစ်နေ့သောအခါ ကမ္ဘာ့စစ်တုရင်ပြိုင်ပွဲ ဝင်ရောက် ယှဉ်ပြိုင်ကစားလိုသည့် အိပ်မက်ဖြစ်သည်။ သူသည် စစ်တုရင်ကစားခြင်းကို စွဲလမ်းခုံမင်သူ ဖြစ်သည်။
မာဂျစ်သည် ဆွန်နီမွတ်ဆလင် ဖြစ်သည်။ အီဂျစ်နိုင်ငံ နိုးထလာသည့် ၁၉၅ဝ ပြည့်လွန်နှစ်များမှ စ၍ သူသည် အီဂျစ်တွင် နေလာခဲ့သည်။ ၁၉၈၅ ခုနှစ် နွေရာသီတွင် မာဂျစ်က လုပ်ငန်းသစ် ထူထောင်ရန် ဒိန်းမတ်နိုင်ငံ ကိုပင်ဂေမြို့သို့ ရောက်လာသည်။ သူ ရောက်လာသည့်နေ့တွင် ဟိုတယ်ခန်းထဲ၌ စစ်တုရင် စာအုပ်ကို ဖတ်လျက် ရှေ့တွင် စစ်တုရင်ခုံချထားသော လူတစ်ယောက်ကို သတိထားမိလိုက်သည်။
ထိုလူအား စိတ်ဝင်စားသော်လည်း အစည်းအဝေး နောက်ကျနေသဖြင့် စကားမပြောဖြစ်လိုက်။ နောက်တစ်နေ့တွင်လည်း ထိုလူကို ယမန်နေ့က အနေအထားအတိုင်းပင် တွေ့ရသဖြင့် ပခုံးကို အသာတို့လိုက်ပြီး…
“ခွင့်ပြုပါ ခင်ဗျား” “နေဦး… နေဦး…” ထိုသူက စစ်တုရင်ခုံမှ မျက်လုံးမခွာဘဲ အသံပြတ်နှင့် ပြောသည်။
မာဂျစ်က နောက်တွင် ခပ်ယို့ယို့ ရပ်လိုက်ပြီး စစ်တုရင်ရုပ်များ၏ အနေအထားကို လေ့လာလိုက်ပြီး အကောင်းဆုံး ရွှေ့ကွက်ကို ထောက်ပြသည်။ ထိုသူက နောက်သို့ လှည့်ကြည့်ပြီး “ခင်ဗျား စစ်တုရင် ကောင်းကောင်း ကစားတတ်တာပဲ”ဟု ပြောသည်။ သူတို့နှစ်ယောက် စကားလက်ဆုံကျသွားသည်။ မာဂျစ်သည် စစ်တုရင်အကြောင်း ပြောရမည်ဆိုလျှင် ထမင်းမေ့ ဟင်းမေ့သူ ဖြစ်သည်။ သူတို့ စကားဝိုင်းသည် (၂)နာရီကျော် ကြာမြင့်သည်။
မာဂျစ်၏ စစ်တုရင်မိတ်ဆွေမှာ ကနေဒါနိုင်ငံသား မာခ် ဆိုသူ ဖြစ်သည်။ ထိုသူသည် ကနေဒါ ကုမ္ပဏီတစ်ခုမှ အထက်တန်း အရာရှိကြီး တစ်ဦးဖြစ်သည်။ ဘိုးဘွားများမှာ လီဘနွန်ဇာတိ ခရစ်ယန်များိ ဖြစ်ကြသည်ဟု သိရသည်။အေးဂျင့်များသည် အယောင်ဆောင်ရာတွင် ကိုယ်ပိုင်လုပ်ငန်းရှင်အဖြစ် အယောင်ဆောင်ခဲလှသည်။ ထိပ်ပိုင်းအရာရှိအဖြစ် ဟန်ဆောင်မှသာ လုပ်ငန်းစကားပြောကြသည့်အခါ အချိန််ဆွဲလိုပါက အထက်ကို ပြန်မေးရဦးမည်ဟုဆိုကာ အချိန်ဆွဲထားနိုင်မည် ဖြစ်သည်။
အမှန်စင်စစ် မာခ်သည် မော့ဆက်အေးဂျင့် (Yehuda Gull) ဖြစ်သည်။ ဘရပ်ဆဲလ်တွင် တာဝန်ကျနေရာမှ မာဂျစ်အား သိမ်းသွင်းရန် တာဝန်ဖြင့် ရောက်လာခြင်း ဖြစ်သည်။ မော့ဆက်၏ မူရင်းပစ်မှတ်မှာ မာဂျစ် မဟုတ်။ မာဂျစ်၏ အစ်ကို ဆီးရီးယားကာကွယ်ဝန်ကြီးဌာနမှ ထိပ်တန်းအရာရှိကြီး ဂျာဒစ်(Jadid) ဖြစ်သည်။ မော့ဆက်သည် ဂျာဒစ်အား သိမ်းသွင်းရန် ပါရီတွင် တစ်ကြိမ် ကြိုးစားခဲ့ဖူးသည်။ အေးဂျင့်များက သေသေသပ်သပ် လုပ်ခဲ့သည်မို့ ဂျာဒစ်က သတိမပြုမိခဲ့။
ယခုတစ်ကြိမ် သိမ်းသွင်းရန် ဇာတ်လမ်းစခဲ့သည်မှာ ၁၉၈၅ ခုနှစ်၊ ဇွန်လ(၁၃)ရက်နေ့။ အေးဂျင့် အေမာသည် မော့ဆက်ဌာနချုပ် သတ္တမထပ် ဒိန်းမတ်ဌာနစိတ်တွင် တာဝန်ကျနေသည်။ ဝင်လာသော စာများထဲတွင် ဒိန်းမတ်ရှိ မော့ဆက်အေးဂျင့် (ဆက်သွယ်ရေးအရာရှိ)ထံမှ ဝင်လာသော စာတစ်စောင် ပါဝင်သည်။ ထိုစာတွင် အာရပ်နွယ်ဖွား လူ(၄ဝ)၏ စာရင်းပါလာသည်။
ထိုသူများသည် အကြမ်းဖက်အဖွဲ့အစည်းများနှင့် ပတ်သက်မှု ရှိ/မရှိ စစ်ဆေးပေးရန် ဖြစ်သည်။ ဒိန်းမတ်သည် ဒုတိယကမ္ဘာစစ်အတွင်းက ဂျူးအမြောက်အမြားကို ကယ်တင်ပေးခဲ့သည်။ ထိုကြောင့် ဂျူးများသည် ဒိန်းမတ်တို့အား ကျေးဇူးရှင်အဖြစ် သတ်မှတ်ထားလိမ့်မည်ဟု ဒိန်းမတ်လူမျိုးများက ယူဆသည်။
သူတို့၏ အတွင်းရေးကိစ္စများကို အစ္စရေးအား စိတ်ချလက်ချ အသိပေးသည်။ မော့ဆက်ကို ယုံကြည်စွာ ဆက်ဆံသည်။ အခွင့်အရေးပေးသည်။ အစ္စရေးထံမှလည်း အကူအညီ တောင်းခံလေ့ရှိသည်။ ဒိန်းမတ်တို့ လာရောက်မည့်၊ ပြောင်းရွှေ့ အခြေစိုက်ကြမည့် အာရပ်နွယ်ဖွားတို့သည် ကင်းရှင်းမှု ရှိ/မရှိ အစ္စရေးအား စစ်ဆေးခိုင်းလေ့ရှိသည်။ ယင်းသို့ စစ်ဆေးခိုင်းသည်ကို ဒိန်းမတ်ပြည်သူများက မသိပေ။ အစိုးရထိပ်ပိုင်းလောက်သာ သိထားသည်။
စစ်ဆေးပြီး ကင်းရှင်းသူဟု တွေ့ရသူ အမည်ဘေးတွင် အမှန်ခြစ် အမှတ်အသားကို မော့ဆက်က ခြစ်ပေးလိုက်ရသည်။ အကယ်၍ ရှုပ်ထွေးမှု တွေ့ရှိလျှင် ဒိန်းမတ်အာဏာပိုင်များအား အသိပေးသည့်အခါတွင် ပေးပြီး မပေးဘဲ ထားလိုက်သည့်အခါများလည်း ရှိသည်။ အသိမပေးဘဲ ထားလိုက်သူကို မော့ဆက်က ဆက်လက်စုံစမ်းသည်။ အစ္စရေးနှင့်ဒိန်းမတ် ထောက်လှမ်းရေးအဖွဲ့အစည်းများသည် များစွာ ရင်းနှီးကြသည်။ ဒိန်းမတ်ဘက်မှ ပွင့်ပွင့်လင်းလင်း ရှိသည်ကို အစ္စရေးက အခွင့်ကောင်းယူလွန်းသည်။ တစ်ဖက်စောင်းနင်း ဆက်ဆံရေးဖြစ်သည်။
ဒိန်းမတ်က မည်မျှအထိ အခွင့်အရေး ပေးသနည်းဆိုသော် မော့ဆက် အေးဂျင့်တစ်ယောက်သည် ဒိန်းမတ်ထောက်လှမ်းရေးဌာနတွင် ရုံးထိုင်ကာ အာရပ်နွယ်ဖွားများ တယ်လီဖုန်းပြောဆို ဆက်သွယ်မှုများကို စောင့်ကြည့်နားထောင်ခွင့် ပေးထားသည်။ အများသုံး ဖုန်းများတွင် ကြားဖြတ်နားထောင်သည့် ကိရိယာများ တပ်ဆင်ရာတွင် မည်သည့်နေရာတွင် တပ်ဆင်ရမည်ကို မော့ဆက်က အကြံပေးသည်။ ထိုအခါ မော့ဆက်က အာရပ်နွယ်ဖွား အများစု နေထိုင်ရာ ရပ်ကွက်များရှိ ဖုန်းများတွင် ကြားဖြတ်နားထောင်သည့် ကိရိယာများ တပ်ဆင်ခိုင်းသည်။
မည်သည့် နိုင်ငံခြားထောက်လှမ်းရေးအဖွဲ့စည်းမျှ မရနိုင်သော အခွင့်အရေး ဖြစ်သည်။ ဒိန်းမတ်တွင် တာဝန်ချထားသော မော့ဆက်အေးဂျင့်သည် အာရဗီစကား တတ်ကျွမ်းသူဖြစ်သော်လည်း ပြောဆိုဆက်သွယ်မှုများကို အသံသွင်းယူလျက် တဲလ်အဗစ်သို့ ပေးပို့သည်။ ယင်းသွင်းယူချက်များကို ဘာသာပြန် ရိုက်နှိပ်ထားသော မှတ်တမ်းများအား ဒိန်းမတ်လက်သို့ ပေးသည့်အခါတွင် မူရင်းအတိုင်း မဟုတ်တော့ဘဲ ဖြတ်တောက်မှုများစွာ လုပ်ထားသည်။
မော့ဆက်သည် ဤမျှ လူလည်ကျသည်။ အစ္စရေးသည် ဒိန်းမတ်ကို လေးစားမှု မရှိ။ ဒိန်းမတ်ကို (small burst of gas, fart) အီးပုန်းဟု အမည်ပြောင်ပင် ပေးထားသည်။
မော့ဆက်သည် နိုင်ငံအများအပြားမှ ထောက်လှမ်းရေး အဖွဲ့အစည်းများနှင့် သတင်းဖလှယ် ဆွေးနွေးပွဲများသို့ မကြာခဏ ပြုလုပ်သည်။ ယင်းသို့ဖြင့် မော့ဆက်သည် ကမ္ဘာပေါ်ရှိ အကြမ်းဖက်အဖွဲ့အစည်းအားလုံးနှင့် ပတ်သက်၍ အသိဆုံး နားအလည်ဆုံး ထောက်လှမ်းရေးအဖွဲ့အစည်း ဖြစ်လာသည်။
ကိုပင်ဟေဂင်မှ ရောက်လာသော လူစာရင်းကို မော့ဆက် ကွန်ပျူတာတွင် စိစစ်ရာ တစ်နာရီခန့်သာ ကြာသည်။ စာရင်းပါ နောက်ဆုံးအမည်(၄)ခုကို စိစစ်နေခိုက် မာဂျစ်၏ နောက်ဆုံးအမည် (မိသားစုအမည်)သည် အေမာရဲ့ စိတ်ကို စနိုးစနောင့် ဖြစ်သွားစေသည်။ ထိုအမည်ကို တစ်နေရာတွင် ကြားဖူးသည်ဟု သူက ထင်သည်။
ထိုနေ့ နံနက်က သုတေသနဌာနမှ မိတ်ဆွေဝန်ထမ်း တစ်ဦးနှင့် သွားရောက်စကားပြောစဉ် စားပွဲပေါ်ရှိ ကွန်ပျူတာတွင် ဆီးရီးယားသမ္မတ ဟာဖဇ် အယ်လ်အာဆတ် (Hafez alAssad)၏ နံဘေးတွင် ရပ်နေသူ၏ အမည်ကို တွေ့လိုက်ရသည်။ ထိုသူ၏ မိသားစုအမည်သည် မာဂျစ်၏ မိသားစုနှင့် အတူတူပင် ဖြစ်နေသည်။ သို့သော် မာဂျစ်နှင့် ပတ်သက်သော မှတ််တမ်းမှတ်ရာသည် ကွန်ပျူတာထဲတွင် မရှိ။
နေ့လည်စာ စားသည့်အခါ နံနက်က သူတွေ့သည့် ဓာတ်ပုံယူလာပေးရန် မိတ်ဆွေဝန်ထမ်းအား တယ်လီဖုန်းဖြင့် ပြောလိုက်သည်။ နဝမအထပ််ရှိ စားသောက်ဆိုင်တွင် နေ့လည်စာ စားနေစဉ် အေမာသည် ဓာတ်ပုံကို အပြန်ပြန်အလှန်လှန် စစ်ဆေးသော်လည်း မာဂျစ်နှင့် ပတ်သက်သော သဲလွန်စ မတွေ့ရ။ဂျာဒစ်တွင် ညီတစ်ယောက် ရှိပြီး ထိုညီသည် အီဂျစ်တွင် နေထိုင်သည်ဟု ကွန်ပျူတာထဲတွင် တွေ့ရသည်။
ကွန်ပျူတာထဲတွင် ရှိသော ထိုညီ၏ ကိုယ်ရေးအချက်အလက်များသည် မာဂျစ်၏ ဗီဇာလျှောက်လွှာပေါ်တွင် ဖော်ပြထားသော ကိုယ်ရေးအချက်အလက်များနှင့် ကိုက်ညီသည်ကို တွေ့ရသည်။
အေမာသည် သူ၏ တွေ့ရှိချက်နှင့် ပတ်သက်၍ တင်ပြလွှာတစ်စောင် ရေးသားပြီး ရုံးတွင်း လှည့်လည် စာတွဲတွင် ထည့်ပေးလိုက်သည်။ ဒိန်းမတ် အာဏာပိုင်များထံသို့မူ တစ်စုံတစ်ရာ ပြန်ကြားခြင်း မပြုဘဲ ထားလိုက်သည်။ ပြန်ကြားခြင်းမရှိသည့်အတွက် မာဂျစ်နှင့်ပတ်သက်ပြီး မော့ဆက်က မှတ်ချက်ပေးရန် မရှိဟု သူတို့က ယူဆလိုက်မည် ဖြစ်သည်။
မော့ဆက်က အေးဂျင့်များထံ နှစ်စဉ်ဖြန့်ဝေသော လက်စွဲစာအုပ်တွင် အစ္စရေးက သိရှိရန်လိုအပ်သည့် သတင်းအချက်အလက်များကို စာရင်းပြု ဖော်ပြထားသည်။ ဆီးရီးယား၏ စစ်ရေးသတင်းသည် သိရှိရန်လိုအပ်သော ထိပ်တန်းဦးစားပေး စာရင်းဝင် ဖြစ်သည်။
ရန်ဘက်ဖြစ်သော ဆီးရီးယား စစ်တပ်နှင့် ပတ်သက်၍ သိရှိလိုသော သတင်းအချက်အလက်များကို စာရင်းပြုစုထားသည်မှာ စာမျက်နှာ(၁၁)မျက်နှာ ရှိသည်။ ဆီးရီးယားတွင် ခြေလျင်တပ် မည်မျှ ရှိသည်။ ယန္တယား တပ်မဟာ(၈၇) လက်အောက်ရှိ သံချပ်ကာတပ်မ (၆ဝ)နှင့်(၇၇)တို့၏ စစ်ပွဲဝင်နိုင်မှု အခြေအနေ၊ အထူးတပ်မဟာ(၁၄) အောက်ရှိ တပ်မအရေအတွက် စသည်တို့ကို သိရှိရန် လိုအပ်ကြောင်း စာရင်းတွင် ဖော်ပြထားသည်။
ဆီးရီးယားနိုင်ငံအတွင်း အောက်ခြေသတင်းများ ရှိနေသည်။ သူတို့သည် စစ်ပွဲ အရိပ်အယောင်များကို စောင့်ကြည့် သတင်းပို့မည့်သူများ ဖြစ်သည်။ ဆေးရုံ၊ ဆောက်လုပ်ရေးလုပ်ငန်း၊ သင်္ဘော၊ ကုန်တင်ကုန်ချ စသည််တို့တွင် စစ်ပွဲသို့ ဦးတည်မည့် လှုပ်ရှားမှုများကို တွေ့ရပါက ယင်းတို့က သတင်းပို့မည် ဖြစ်သည်။ သို့သော် အစ္စရေးတို့ သိမ်းပိုက်ထားသည့် ဂိုလန်ကုန်းမြင့်ဒေသတွင် ဆီးရီးယားတပ်များ အမြဲလို စစ်ပြင်နေသည့်ပုံစံ တွေ့နေရသည့်အတွက် အစ္စရေးအဖို့ သောကပွားစရာ ဖြစ်နေသည်။ စစ်ပွဲတော့ ဖြစ်မလာသေး။ ထို့ကြောင့် ဆီးရီးယားက အမှန်တကယ် တိုက်တော့မည်ဆိုတာကို ကြိုတင်သိရန် လွန်စွာ အရေးကြီးသည်။ ဆီးရီးယား ထိပ်ပိုင်းအရာရှိ တစ်ဦးဦးကို သတင်းပေးအဖြစ် သိမ်းသွင်းရန် မဖြစ်မနေ လိုအပ်လျက် ရှိသည်။
ဆီးရီးယားတို့သည်် လူတစ်ဦးတည်းက အာဏာရှင်အဖြစ် အုပ်ချုပ်နေသော တိုင်းပြည်ဖြစ်သဖြင့် လုံးဝ စိတ်မချရ။ သမ္မတ အာဆတ်သည် တစ်နံနက် အိပ်ရာမှ ထလာပြီး “လာကွာ… ငါတို့ အစ္စရေးကို တိုက်ရအောင် စစ်ကြေညာလိုက်”ဟု လုပ်မည့် လူစားမျိုး ဖြစ်သည်။ စိတ်ရူးပေါက်တိုင်း ထလုပ်နိုင်သည်။ ထို့ကြောင့် ထိပ်ပိုင်းမှ သတင်းပေးမည့်လူ လိုအပ်နေသည်။
ဆီးရီးယားသည် ဂိုလန်ကုန်းမြင့်ကို ပြန်လိုချင်နေသည်။ လျှပ်တပြက် ဝင်တိုက်မည်ဆိုလျှင် ပြန်ရနိုင်သည်။ သို့သော် သူသည် ဂိုလန်ကုန်းမြင့်ကို ကြာကြာ ထိန်းထားနိုင်မည်မဟုတ်။ အာဆတ်၏ အကြံမှာ ဂိုလန်ကုန်းမြင့်ကို လျှပ်တပြက် ဝင်တိုက်ပြီး သိမ်းပိုက်ထားလိုက်မည်။ ထိုအချိန်တွင် ရုရှားက ကုလသမဂ္ဂမှ တစ်ဆင့်ဖြစ်စေ၊ အခြားနည်းဖြင့်ဖြစ်စေ၊ စစ်ပွဲကို အမြန်ဆုံး ရပ်တန့်ပေးရန် အကြံပြုဖူးသည်။ သို့သော် ထိုအကြံကို ရုရှားက လက်မခံခဲ့။
ယင်းသို့သော အခြေအနေများအရ မာဂျစ်ကို သိမ်းသွင်းရန်မှာ အရေးကြီးဆုံး တာဝန်ဖြစ်လာသည်။ မာဂျစ်သည် ကိုဟေဂင်သို့ ရောက်မလာမီ ယီဟူဒါဂျီလ် (မာခ်အဖြစ် မာဂျစ်က သိသူ)နှင့် မော့ဆက်အဖွဲ့ ရောက်လာကြသည်။ မာဂျစ် တည်းခိုမည့် ဟိုတယ်ခန်းတွင် မိုက်ခရိုဖုန်းနှင့် ကင်မရာများ လျှို့ဝှက် တပ်ဆင်ကြသည်။
မာဂျစ်နှင့်် အဆက်သွယ်ရစေရန် မည်သို့ ထောင်ချောက်ဆင်ရမည်ကို အတန်ကြာ အခြေအတင် ငြင်းခုံ ဆွေးနွေးကြရသည်။ စစ်တုရင်သမားအဖြစ် ချဉ်းကပ်ရန် အကြံကို ယီဟူဒါဂျီလ်က စတင် ဆွေးနွေးသည်။ မာခ်သည် ယုံကြည်ထိုက်သူဟု မာဂျစ်က ယူဆသည်။ ထို့ကြောင့် ရင်းရင်းနှီးနှီး ဆက်ဆံကာ ကိုယ်ရေးကိုယ်တာ ကိစ္စများကိုပင် ထုတ်ဖော်ပြောဆိုသည်။ ပထမအကြိမ် တွေ့ပြီး မခွဲခွာမီ ညစာအတူစားကြရန် မာဂျစ်က မာခ်အား ဖိတ်ခေါ်သည်။ မာခ်သည် ဟိုတယ်မှ အေးဂျင့်များ ကွန်းထောက်စခန်း သို့ ပြန်ပြေးလာပြီး မည်သို့လုပ်ရမည်ကို တိုင်ပင်သည်။
ညစာ စားကြသည့်အခါ မာဂျစ်၏ အရိပ်အခြည်ကို ကြည့်လျက် လှုပ်ရှားရန်၊ မာဂျစ် မည်မျှ သိထားသည်၊ သူ့အစ်ကိုအတွက် သူသည် မည်မျှ အရေးပါသည်တို့ကို စူးစမ်းရန် အေးဂျင့်များက သဘောရကြသည်။ မာခ်အနေနှင့်မူ ကြွယ်ဝသော၊ အဆက်အသွယ်ကောင်းသူ၊ အောင်မြင်နေသော စီးပွားရေး လုပ်ငန်းတစ်ခုမှ အရာရှိကြီးတစ်ဦးအဖြစ် ဟန်ဆောင်နေရန် ဖြစ်သည်။
ညစာ စားကြသည့်အခါ မာဂျစ်က သူ့မိသားစုသည် အီဂျစ်တွင် ရှိနေကြောင်း၊ မိသားစုကို ဒိန်းမတ်သို့ ပြောင်းရွှေ့ အခြေချရန် စိတ်ကူးနေကြောင်း၊ လောလောဆယ် ငှားရမ်းနေထိုင်ရန် အိမ်ခန်းတစ်ခန်း ရှာဖွေနေကြောင်း၊ ဇနီးသည် ရောက်လာပြီး အခြေတကျ ဖြစ်လာသည့်အခါတွင်မှ အပိုင်ဝယ်မည်ဖြစ်ကြောင်း ပြောဆိုရာ မာခ်က တိုက်ခန်းကိစ္စကို သူအကူအညီပေးနိုင်ကြောင်း၊ အိမ်ခြံမြေကိုယ်စားလှယ် လွှတ်ပေးမည်ဖြစ်ကြောင်း ကတိပေးလိုက်သည်။
မာဂျစ်သည် တစ်ပတ်အတွင်း တိုက်ခန်းရသွားသည်။ ထိုတိုက်ခန်းတွင် မော့ဆက်က မိုက်ခရိုဖုန်းနှင့် ရုပ်မြင်ကင်မရာများ လျှို့ဝှက်စွာ တပ်ဆင်ထားပြီး ဖြစ်သည်။ မျက်နှာကြက်အတွင်း အပ်ပေါက် ကင်မရာလေးများ (pin hole camera)လည်း တပ်ဆင်ထားသည်။ အလုပ်ကိစ္စဖြင့် ကနေဒါသို့ သွားမည်ဟု မာဂျစ်အား ပြောကာ မာခ်က ခေတ္တ ရှောင်နေလိုက်သည်။
မော့ဆက်အဖွဲ့က မာဂျစ်တိုက်ခန်းအတွင်း လှုပ်ရှားနေမှုကို ရုပ်မြင်ကင်မရာမှ တစ်ဆင့် စောင့်ကြည့်ကြသည်။ မာဂျစ်သည် လိကိစ္စတွင် စံလွဲသူ မဟုတ်။ သို့သော် လိကိစ္စကို ခုံမင်သူ ဖြစ်သည်။ သူ၏ တိုက်ခန်းကျယ်ကြီးတွင် ဖျောဖြေရေး အီလက်ထရွန်းနစ် ကိရိယာများ အပြည့်အစုံ ဝယ်ထားသည်။
မာဂျစ်သည် အစ်ကိုဖြစ်သူ ဂျာဒစ်ထံသို့ တစ်ပတ်လျှင် နှစ်ကြိမ် ဖုန်းဆက်သည်။ သူတို့ ပြောစကားများအရ ဂျာဒစ်အတွက် ငွေရပေါက်များ ဖန်တီးပေးနေသည်ကို သိလာရသည်။ မာဂျစ်မှ တစ်ဆင့် ဂျာဒစ်သည် ညစ်ညမ်းရုပ်ရှင်များ ဝယ်ယူကာ ဆီးရီးယားတွင် ပြန်လည် ရောင်းချကာ ဝင်ငွေလမ်းဖြောင့်နေသည်။ ဂျာဒစ်သည် တစ်လခန့် အကြာတွင် ကိုပင်ဟေဂင်သို့ လာမည်ဟု မော့ဆက်က သိလိုက်ရသည်။
ထို့ကြောင့် မာခ်က ပြန်ပေါ်လာရပြန်သည်။ မာဂျစ်အား လုပ်ငန်းတစ်ခုခု လုပ်ရန် သွေးဆောင်သည်။ “ကျွန်တော့် အလုပ်က ရင်းနှီးမြှုပ်နှံသူတွေကို ရင်းနှီးမြှုပ်နှံမှု အလားအလာကောင်းတွေကို ရှာဖွေပေးရတယ်။ အဲဒီလို ရှာဖွေပေးတဲ့အခါမှာ အကျိုးအမြတ် ရနိုင်မှု၊ ဆုံးရှုံးနိုင်ခြေ၊ အလားအလာ စတဲ့ အချက်အလက်များအပေါ် မူတည်ပြီး အခြေအနေသို့ သုံးသပ်ပေးရတယ်။ တိုင်းပြည်တစ်ပြည်မှာ မြှုပ်နှံသင့်/မသင့်ဆိုတာကို ကျွန်တော်တို့က အချက်အလက်တွေ စုဆောင်းပြီး အကဲဖြတ်ပေးရတယ်။ စီအိုင်အေ လုပ်တဲ့ အလုပ်မျိုးလို့လည်း ဆိုနိုင်တယ်”ဟု မာခ်က စကားလမ်းခင်းသည်။
စီအိုင်အေဆိုသည့် စကားလုံးကို တမင် ထည့်သုံးလိုက်ခြင်း ဖြစ်သည်။ ထိုစကားလုံးနှင့် ပတ်သက်၍ မာဂျစ်က မည်သည့်တုံ့ပြန်မှုမျိုးမျှ မပြ။ အာရပ်များသည် စီအိုင်အေဆိုသည့် စကားလုံးကို ကြားလိုက်သည့်အခါ ပြင်းထန်စွာ တုံ့ပြန်လေ့ရှိသည်။ မာဂျစ်က တုံ့ပြန်မှု မရှိသည့်အတွက် မာခ်က ရိပ်မိသွားသည်။ မာဂျစ်အား စီအိုင်အေက သိမ်းသွင်းထားပြီလော့ဆိုသည့် သံသယ ပေါ်လာသည်။ သို့မဟုတ် အခြားအဖွဲ့အစည်း တစ်ခုခုက သိမ်းသွင်းထားခြင်းလည်း ဖြစ်နိုင်သည်။
သို့သော် မာဂျစ်သည် သိမ်းသွင်းခံထားရသူ မဟုတ်မှန်း သိလာရသည်။ အရာရာကို သူသည် ပြင်းထန်စွာ တုံ့ပြန်တတ်သူ မဟုတ်။ သူသည် သွေးအေးသူသာ ဖြစ်သည်။ မာခ်က ဆက်ပြောသည်။ “ဒီလုပ်ငန်း သဘာဝအရ သတင်းပို့ဖို့အတွက် ကျွန်တော်တို့က ငွေပေးပြီး ဝယ်ရတယ်။ တိုင်းပြည်တစ်ပြည်မှာ ရင်းနှီးမြှုပ်နှံဖို့ သင့်/မသင့်ဆိုတာ သိဖို့၊ အဲဒီတိုင်းပြည်ရဲ့ အချက်အလက်တွေကို သိထားဖို့ လိုတယ်။ အဲဒီ အချက်အလက်တွေကို ငွေပေးပြီး ဝယ်ရတယ်။ ကျွန်တော်တို့ဟာ လုပ်ငန်းအကြီးစားတွေအတွက် လုပ်ပေးနေရတော့ ကျွန်တော်တို့ ရတဲ့ သတင်းတွေဟာ ခိုင်မာဖို့ လိုတယ်။ သူပြော ငါပြော လမ်းပေါ်က သတင်းမျိုးကို သုံးလို့ မရဘူး”
“ဥပမာအားဖြင့် ပြောရရင် အီရတ်က စွန်ပလွံသီး ဝယ်မယ်သူဟာ အီရန်-အီရတ် စစ်ဖြစ်တော့မယ်ဆိုတာ သိရင် ဝယ်မှာမဟုတ်ဘူး။ စစ်ဖြစ်နေရင် ကုန်သင်္ဘောတွေ သွားလာလို့ မဖြစ်တော့ဘူး။ ကိုယ်မှာထားတဲ့ စွန်ပလွံသီးတွေ ရောက်လာမှာ မဟုတ်ဘူး။ နိုင်ငံရေးနှင့် စစ်ရေးသတင်းကို စျေးကွက်မှာ ကျွန်တော်တို့က အသုံးချတယ်”ဟု မာခ်က ရှည်ရှည်လျားလျား ရှင်းပြသည်။
မာဂျစ်က သူ့စကားကို စိတ်ဝင်စားလာသည်။ သူက “ကျွန်တော့်အလုပ်က ဒီလို အလုပ်မျိုး မဟုတ်ဘူး။ ဒါပေမဲ့ ခင်ဗျားစိတ်ဝင်စားပေမဲ့ လူတစ်ယောက်နဲ့ ကျွန်တော် မိတ်ဆက်ပေးနိုင်တယ်။ အဲဒီအတွက် ကျွန်တော့် အကျိုးအမြတ်က ဘယ်လိုလဲ”
“သတင်းပေးနိုင်တဲ့ လူရှာပေးတဲ့အတွက် ပွဲခပေးပါတယ်။ ဒါ့အပြင် ရရှိတဲ့ သတင်းတန်ဖို့အပေါ်မှာလည်း ရာနှုံးနဲ့ တွက်ပြီး ပွဲခအဖြစ် ပေးတယ်။ သတင်းရဲ့ တန်ဖိုး၊ ဘယ်တိုင်းပြည်အတွက်လဲ ဆိုတာတွေ အပေါ်မှာ မူတည်ပြီး ငွေကြေးပမာဏ ကွာခြားတယ်။ ဒေါ်လာ လေးငါးထောင်ကနေ သိန်းချီတဲ့အထိ ရနိုင်ပါတယ်”
မာဂျစ်။ ။“ခင်ဗျားက ဘယ်တိုင်းပြည်က အချက်အလက်တွေကို လိုချင်တာလဲ” မာခ်။ ။“လောလောဆယ်တော့ ဂျော်ဒန်၊ အစ္စရေး၊ ဆိုက်ပရပ်စ်၊ ထိုင်းတို့နှင့် ပတ်သက်တာတွေ သိချင်တယ်”
မာဂျစ်။ ။“ဆီးရီးယား ဆိုရင်ကော”
မာခ်။ ။“ဖြစ်နိုင်ပါတယ်၊ ကျွန်တော့် ဖောက်သည်တွေကို မေးကြည့်ပြီး ပြန်ပြေပါ့မယ်။ ဖောက်သည်က ဘယ်လို သတင်းမျိုး လိုချင်တယ် ဆိုတာရယ်၊ သတင်းက ဘယ်အဆင့်ကနေ လာတာလဲ ဆိုတာလည်း အရေးကြီးတယ်”
မာဂျစ်။ ။“ဒါတော့ စိတ်ချ၊ ကျွန်တော့်သတင်းက ထိပ်ဆုံးက လာတာ”
(၂)ရက်အကြာတွင် ထပ်မံတွေ့ကြရန် ချိန်းဆိုသည်။ သူတို့ ထပ်မံ မတွေ့မီ မာဂျစ်က အစ်ကိုဖြစ်သူထံ ဖုန်းဆက်ပြီး အရေးကြီးကိစ္စ ရှိနေသဖြင့် ဒိန်းမတ်သို့ အမြန်လာရန် ပြောသည်။ေ နာက်တစ်ကြိမ် တွေ့ကြသည့်အခါ မာခ်က “ဆီးရီးယားကို စိတ်ဝင်စားတဲ့သူတွေ ရှိတယ်။ အလုပ်ဖြစ်နိုင်ပါတယ်။ တကယ်ကောင်းတဲ့ သတင်းဆိုရင်တော့ အကျိုးအမြတ် ကောင်းကောင်း ရနိုင်ပါတယ်”
ဂျာဒစ်ကို မာဂျစ်တိုက်ခန်းတွင် မာခ်က သွားတွေ့သည်။ ဂျာဒစ်၏ ရာထူးကို မသိဟန်ပြုလျက် မာခ်က မေးခွန်းများ မေးသည်။ သူ့ ကုမ္ပဏီအနေဖြင့် သတင်းအချက်အလက်တွေကို အသုံးပြုရန် ဖြစ်နိုင်/မဖြစ်နိုင်၊ ကုမ္ပဏီ၏ ဖောက်သည်များအတွက် အသုံးဝင်သော သတင်းအချက်အလက်များ ဟုတ်/မဟုတ် သိရှိနိုင်ရန် မေးမြန်းခြင်းဖြစ်သည်ဟု မာခ်က စကားခံသည်။
မာခ်က စစ်ရေးမေးခွန်းများကို တခြားမေးခွန်းများနှင့် ရောနှောမေးမြန်းသည်။ သူ၏ မူရင်းရည်ရွယ်ချက်ကို မရိမိစေရန် ဖြစ်သည်။ ရရှိလာသော သတင်းအချက်အလက်များကို ကွန်းထောက်စခန်းတွင် တခြားအေးဂျင့်များနှင့် စိစစ်သည်။ မာဂျစ်အား သတင်းပေးနိုင်သူ ရှာပေးသည့်အတွက် ဒေါ်လာ(၃)သောင်း၊ ဂျာဒစ်အား ဒေါ်လာ(၂)သောင်းနှင့် မာဂျစ်အား လစဉ် ဒေါ်လာ(၂)ထောင် ပေးရန် သဘောတူသည်။ ဂျာဒစ်အတွက် ပထမ(၆)လ ကြိုတင်ငွေကို ကိုပင်ဟေဂင်တွင် မာခ်က ဘဏ်စာရင်း ဖွင့်ပေးမည် ဖြစ်သည်။
မာခ်သည် ဂျာဒစ်အား လျှို့ဝှက်စာရေးနည်းကို ခဲတံဖြင့် သတင်းပေးပို့ချက်ကို ရေးသားပေးရန် ဖြစ်သည်။ ခံတဲကို ဓာတုနည်းဖြင့် ပြုလုပ်ထားသဖြင့် ခဲသား၏ ခြစ်ရာမှတ်ရာများသည် စာရွက်ပေါ်တွင် မမြင်နိုင်ပေ။ ထိုနည်းဖြင့် စာရေးသားနည်းကို မာခ်က ဂျာဒစ်အား သင်ပေးသည်။ မာခ် သိလိုသော အချက်အလက်များ စာရင်းကို ဆီးရီးယားနိုင်ငံ ဒမတ်စကတ်တွင် မည်သို့ ယူရမည်ကိုလည်း သင်ပြပေးသည်။
ဆီးရီးယားသို့ အပြန် ဂျာဒစ် ယူသွားရန် သူလျှိုသုံး ပစ္စည်းတချို့ကို မာခ်က ပေးသည်။ သို့သော် ဂျာဒစ်က ယူသွားရန် ငြင်းဆိုသည်။ ထိုအခါ ထိုပစ္စည်းများကို ဒမတ်စကတ်ရှိ မာခ်၏ အဆက်အသွယ်မှ တစ်ဆင့် ရယူရန် စီစဉ်ရသည်။ စကားပြောကြရင်း ဂျာဒစ်က “ခင်ဗျားတို့ အလုပ်က ထောက်လှမ်းရေး အလုပ်လိုပဲနော်”ဟု မှတ်ချက်ပြုသည်။
“ဟုတ်တာပေါ့၊ ဒါကြောင့် ထောက်လှမ်းရေးသမားဟောင်းတွေကို တချို့ကိစ္စတွေမှာ ခေါ်သုံးရတယ်။ ဒါပေမဲ့ ထောက်လှမ်းရေးအေဂျင်စီတွေနဲ့ ကျွန်တော်တို့နဲ့ ကွာတာက ကျွန်တော်တို့က ငွေအတွက် လုပ်ကြတာ၊ ရင်းနှီးမြှုပ်နှံလိုသူတွေက ကျွန်တော်တို့ဆီက သတင်းကို ငွေပေးဝယ်ကြတယ်”ဟု မာခ်က ပြောသည်။
မာခ်က မေးခွန်းများကို စတင် မေးမြန်းသည်။ ထိုမေးခွန်းများထဲတွင် ခပ်ကြောင်ကြောင် မေးခွန်းများ ပါသည်။ မေးမြန်းသည့် မူရင်ရည်ရွယ်ချက် မသိနိုင်စေရန် မဆိုင်သော မေးခွန်းအများအပြားကို ထည့်သွင်းမေးမြန်းခြင်း ဖြစ်သည်။ အိမ်ခြံမြေများ၏ လက်ရှိတန်ဖိုး၊ အစိုးရဌာနများအတွင်း ရာထူးအပြောင်းအလဲ စသည့် အရေးမကြီးသည့် မေးခွန်းများ ထည့်မေးခြင်းဖြင့် မေးခွန်းအားလုံးသည် စစ်ဘက်ဆိုင်ရာ မေးခွန်းများ ဖြစ်မနေစေရန် တမင် စီစဉ်ထားရသည်။
ဂျာဒစ်အား သိမ်းသွင်းသော လုပ်ငန်းသည် ချောချောမောမော ဖြစ်နေသည်။ ချောမောလွန်းသည့်အတွက် သံသယမကင်းစရာ ဖြစ်နေသည်။ အစ္စရေးအတွက် သတင်းပေးလုပ်နေသည်ကို ညီအစ်ကိုနှစ်ယောက် ရိပ်မိတန်ကောင်းသည်။ သို့သော် စမိပြီဖြစ်သည့်အတွက် မော့ဆက်သည် ရှေ့ဆက်ရန်သာ ရှိတော့သည်။ စိတ်ထဲတွင် ရနံ့မကင်းသည်မို့ အေးဂျင့်များက ပိုမို သတိထားလှုပ်ရှားကြသည်။ အေးဂျင့်များ သတိကြီးစွာ ထားကြသည်။
မာခ် သိချင်သော သတင်းအချက်အလက်များကို ဂျာဒစ်အား စာဖြင့် မေးမြန်းလိုက်မည်ဟု ပြောလိုက်သော်လည်း မေးခွန်းများကို ပေးပို့ရန် ရှုပ်ရှုပ်ထွေးထွေး စီးစဉ်ရသည်။
အာရပ်သတင်းများနှင့် ဆက်သွယ်ရာတွင် မော့ဆက်သည် အာရပ်မဟုတ်သူများကို သုံးလေ့ရှိသည်။ အစ္စရေးမြောက်ပိုင်း၊ ဆီးရီးယားနှင့် အစ္စရေးအကြား ကြားခံဇုန်တွင် တာဝန်ကျနေသည့် ကနေဒါလူမျိူး ကုလသမဂ္ဂဝန်ထမ်းတစ်ဦးကို ဆက်သားအဖြစ် အသုံးပြုသည်။ ထိုနေရာတွင် ကုလသမဂ္ဂဝန်ထမ်းများသည် နယ်နမိတ်မျဉ်းကို အတားအဆီးမရှိ ဖြတ်ကျော်နိုင်ကြသည်။
အခေါင်းပေါက်ပါသော ကျောက်တုံးအတွင်း အမေးလွှာမျာကို ထည့်ပြီး ဆီးရီးယားဘက်တွင် ဆက်သားက သွားထားပေးသည်။ ယင်းသို့ တစ်ခေါက်သွားတိုင်း မော့ဆက်က ဒေါ်လာ(၅ဝဝ) ပေးသည်။ ယင်းသို့ သွားထားရာတွင် ဆီးရီးယားဘက် ဟိုက်ဝေးလမ်းမ နံဘေး သတ်မှတ်ထားသည့် ကီလိုမီတာ မှတ်တိုင်(မိုင်တိုင်) ငါးလှမ်းအကွာတွင် ကျောက်တုံးကို ချထားခဲ့ရသည်။
ဂျာဒစ်သည် မော့ဆက် အလိုရှိသော သတင်းများကို မှန်မှန်် ပေးပို့နေခဲ့သည်မှာ (၅)လခန့် ကြာမြင့်လာသည်။ ထိုအချိန်တွင် မမျှော်လင့်သော အဖြစ်အပျက်တစ်ခု တိုးဝင်လာသည်။ ထောက်လှမ်းရေးလုပ်ငန်း၏ သဘာဝမှာ ဤသို့ပင် ဖြစ်သည်။ ထောက်လှမ်းရေးသမားတို့သည် မမျှော်လင့်နိုင်သော အဖြစ်ဆိုးတို့ကို မျှော်လင့်ထားရသည်။ ဂျာဒစ် အစ္စရေးအတွက် သူလျှိုလုပ်ပေးနေသည်ကို ဆီးရီးယား အာဏာပိုင်များက မသိပေ။ သို့သော် သူသည် ညစ်ညမ်းဇာတ်ကားများနှင့် မူးယစ်ဆေး မှော်ခိုလုပ်နေသည်ဟု သင်္ကာမကင်း ဖြစ်လာသည်။ ထို့ကြောင့် သူ့အား လက်ပူးလက်ကြပ် ဖမ်းဆီးနိုင်ရန် စီစဉ်နေကြသည်။
ဥရောပတိုက်ရှိ ဆီးရီးယားသံရုံးများကို စာရင်းစစ်ရန် စာရင်းစစ်အဖွဲ့နှင့်အတူ ဂျာဒစ်သည် ဆီးရီးယားမှ ထွက်လာခဲ့သည်။
လန်ဒန်အခြေစိုက် ဆီးရီးယားသံရုံးရှိ ထက်ထောက်စစ်သံမှူး ဗိုလ်မှူးကြီး ဟာလက်သည်လည်း အစ္စရေးကို သတင်းရောင်းစားနေသူ ဖြစ်သည်။ ဟာလက်သည် သံရုံးအတွင်း အသုံးပြုသည့် ဝှက်စာဖော်နည်း (cipher key)ကို မော့ဆက်သို့ လစဉ်မှန်မှန် ရောင်းစားနေသူ ဖြစ်သည်။ စကားဝှက်ဖော်နည်းသည် လစဉ် ပြောင်းလဲတတ်သဖြင့် ဟာလက်သည် လစဉ် ဝင်ငွေကောင်းနေသူ ဖြစ်သည်။
တစ်ကမ္ဘာလုံးရှိ ဆီးရီးယားသံရုံးများမှ ပေးပို့နေသော စာများနှင့် သံရုံးသို့ ဆီးရီးယားမှ ပေးပို့သော စာများကို ဟာလက်ထံမှ ရသော ဝှက်စာဖော်နည်းဖြင့် မော့ဆက်သည် ဖတ်နေရသည်။ ထိုဖတ်ရှု့နေရသော စာများအနက် စာတစ်စောင်တွင် ဂျာဒစ်သည် သံရုံးစာရင်းစစ်အဖွဲ့နှင့် အတူ ပါလာမည်ဖြစ်ကြောင်း သိရသည်။ ဒမတ်စကတ်မှ ဘေရွတ်ရှိ ဆီးရီးယားသံရုံးသို့ ပေးပို့သော စာတွင် ဂျာဒစ်ကို မူးယစ်ဆေး သယ်ဆောင်မှုဖြင့် ဖမ်းဆီးမည်ဟု ပါရှိသည်။
မော့ဆက်သည် ကြားဝင်ရတော့သည်။ ဂျာဒစ်ကို အသိပေးရန် အချိန်(၃)ရက်သာ ရတော့သည်။ မော့ဆက် အေးဂျင့်တစ်ဦးသည် မူးယစ်ဆေးဝါးကုန်သည် ဟန်ဆောင်လျက် ဂျာဒစ်ထံ ဖုန်းဆက်ကာ “အစီအစဉ် ပြောင်းသွားပြီ၊ (မူးယစ်ဆေး)ကုန်သည်တွေကို ခင်ဗျား သွားမတွေ့နဲ့တော့။ ပစ္စည်းကို ယူသွားဖို့လည်း မလိုတော့ဘူး။ ခင်ဗျား ဟော်လန်ရောက်မှပဲ ပစ္စည်းပို့ပေးလိုက်မယ်”ဟု ပြောလိုက်သည်။
ဂျာဒစ်သည် မူးယစ်ဆေး မှောင်ခိုသမားများနှင့် သွားမတွေ့တော့။ မူးယစ်ကုန်သည်တို့ အဖမ်းခံလိုက်ရသည်။ ဂျာဒစ်သည် သူတို့အား ထောင်ချောက်ဆင်ခြင်း ဖြစ်သည်ဟု မှတ်ယူလျက် တွေ့ရာသချႋုင်း ဓားမဆိုင်း လိုက်ရှာလေတော့သည်။ သို့သော် ဂျာဒစ်သည် ဖြစ်ပျက်နေသည်ကို မသိသေးပေ။ သူ ဟော်လန် ရောက်သည့်အခါ မူးယစ်ကုန်သည်များကို မတွေ့သဖြင့် အကျိုးအကြောင်း သိရှိနိုင်ရန် ဆီးရီးယားရှိ အဆက်အသွယ်များထံ ဖုန်းဆက်သည့်အခါတွင် ဆီးရီးယားရဲနှင့် မူးယစ်ဂိုဏ်းတို့က သူ့ကို အလိုရှိနေကြောင်း သိရတော့သည်။
မော့ဆက်သည် သူ သိထားသမျှကို နောက်ဆုံးအကြိမ်အဖြစ် စစ်မေးပြီး ဒိန်မတ်တွင် အခြေချနေထိုင်နိုင်ရန် စီစဉ်ပေးလိုက်ရသည်။ သူသည် ယခုထက်တိုင် ဒိန်းမတ်တွင် နေထိုလျက် ရှိသည်။ လက်ထောက် စစ်သံမှူးကြီး ဟာလက်၏ ပြဿနာမှာလည်း အသည်းအသန် ဖြစ်သည်။ သူသည် ရုံးမီးခံသေတ္တာထဲမှ ဒေါ်လာ (၁)သောင်းခွဲကို ယူလျက် ကားဝယ်ထားသည်။ ရုံးငွေများကို မကြာခဏဆိုသလို သူက ယူသုံးသည်။ မော့ဆက်ထံမှ လစဉ်ကြေးရသည်အခါ ပြန်ထည့်သည်။
စာရင်းစစ်အဖွဲ့ လာတော့မည်ဖြစ်ကြောင်း မော့ဆက်က (သီးခြား ဆီးရီးယား သံရုံးအချင်းချင်း ပေးစာများမှ) သိလိုက်သည်နှင့် ဟာလက်အား အသိပေးထားသင့်ဟု ယူဆသဖြင့် သံရုံးရှိ သူ၏ သီးသန့်နံပါတ်သို့ ဆက်သွယ်ကာ တွေ့ဆုံလိုကြောင်း အသိပေးသည်။တွေ့ဆုံနေကျ စားသောက်ဆိုင်တွင် တွေ့ရန် ဖြစ်သည်။ မော့ဆက်သည် သူ၏ အဆက်အသွယ်များနှင့် တွေ့ဆုံရာတွင် တွေ့ဆုံသည့်နေရာ (စားသောက်ဆိုင်၊ ပန်းခြံ စသည််)ကို ပုံမှန် (နှစ်ပတ် တစ်ကြိမ်၊ တစ်လ တစ်ကြိမ် စသဖြင့်) ပြောင်းလဲသည်။
ဟာလက်သည် သတ်မှတ်ထားသည့် စားသောက်ဆိုင် စားသောက်ဆိုင်သို့ သွားကာ ၁၅ မိနစ် ထိုင်စောင့်ရမည်။ အဆက်အသွယ် အေးဂျင့် ပေါ်မလာပါက ပေးထားသော ဖုန်းနံပါတ်တစ်ခုသို့ ဆက်သွယ်ရမည်။ တစ်ဘက်မှနေ၍ မည်သည့်နေရာတွင် တွေ့ဆုံရမည်ကို ညွှန်ကြားမည် ဖြစ်သည်။ အကယ်၍ တယ်လီဖုန်း ကိုင်မည့်သူ မရှိပါက ကြိုတင်သတ်မှတ်ထားသော နောက်တစ်နေရာသို့ သွားရမည် ဖြစ်သည်။ ထိုနေရာတွင် ၁၅ မိနစ်စောင့်ပြီး အေးဂျင့်ပေါ်မလာပါက နောက်ထပ် တယ်လီဖုန်းတစ်ခုသို့ ဆက်သွယ်ရန် ဖြစ်သည်။
ဤဖြစ်စဉ်တစ်လျောက်လုံးကို အေးဂျင့်များက တစ်နေရာမှ အကဲခတ်နေပြီး နောက်မှ လိုက်လာသူ ပါ/မပါကို စောင့်ကြည့်နေမည် ဖြစ်သည်။ နောက်ယောင်ခံသူ ပါလာလျှင်သော်လည်းကောင်း၊ တခြားအကြောင်းတစ်ခုခု ရှိလျှင်သော်လည်းကောင်း တယ်လီဖုန်းကို တစ်ဘက်ပြန်ဖြေသူက သူ မည်သို့ ဆက်လုပ်မည်ကို ညွှန်ကြားမည် ဖြစ်သည်။
ဟာလက် စားသောက်ဆိုင် ရောက်သွားပြီး မကြာမီတွင် အေးဂျင့်ပေါ်လာသည်။ မကြာမီ စာရင်စစ်အဖွဲ့ ရောက်လာမည်ဖြစ်ကြောင်း ဟာလက်ကို အေးဂျင့်က ပြောသည်။ ဟာလက်က စိုးရိမ်စရာ မရှိကြောင်း ပြောပြီး ပြန်သွားသည်။ သို့သော် စိုးရိမ်စရာ အခြေအနေရှိနေကြောင်း ဟာလက်က မသိပေ။ သံရုံး မီးခံသေတ္တာထဲမှ အစိုးရငွေကို ယူသုံးထားသည့်အချိန်တွင် စာရင်းစစ်အဖွဲ့ ရောက်လာလျှင် ဟာလက်က ငွေကို မိတ်ဆွေတစ်ယောက်ထံမှ ချေးယူပြီး ပြန်ဖြည့်ထားသည်။
စာရင်းစစ်အဖွဲ့ ပြန်သွားသည့်အခါတွင် ငွေကို မီးခံသေတ္တာထဲမှ ယူပြီး မိတ်ဆွေအား ပြန်ဆပ်သည်။ ယင်းသို့ သူလုပ်နေကျ ဖြစ်သည်။ သူ့အား ငွေချေးနေသည့် မိတ်ဆွေ ခရီးသွားနေသည်ကို ဟာလက်က မသိရှာ။ ဟာလက်နှင့် တွေ့ပြီး ပြန်လာသော အေးဂျင့်သည် အစီရင်ခံစာ ထိုင်ရေးနေစဉ် ဖုန်းဝင်လာသည်။ သံရုံးမှ ဖြစ်သည်။ ဟာလက်သည် သူ့အား ငွေချေးပေးနေသူ ခရီးသွားနေသည်ဟု သိလိုက်သည့်အချိန်တွင် ဆောက်တည်ရာ မရတော့။ သူ့အား မော့ဆက်က ပေးလိုက်သည့် နံပါတ်ကို ဆက်ရတော့သည်။
အစ္စရေးသံရုံး၏ တယ်လီဖုန်းတစ်လုံးသို့ သူ့ဆက်သွယ်မှုက ရောက်သွားသည်။ ထိုဖုန်းနံပါတ်သည် တယ်လီဖုန်း လမ်းညွှန်စာအုပ်ထဲတွင် ဖော်ပြထားခြင်း မရှိပေ။ ဟာလက်က အေးဂျင့်နှင့် တွေ့လိုကြောင်း စကားဝှက်ဖြင့် ပြောသည်။ သူ တယ်လီဖုန််းချသွားသည်နှင့် သံရုံးမှ အေးဂျင့်သည် ဟာလက် သွားရောက်စောင့်ဆိုင်းနေမည့် စားသောက်ဆိုင်သို့ သွားနှင့်ပြီ ဖြစ်သည်။ စားသောက်ဆိုင်ကို စောင့်ကြည့်နေသူ ရှိ/မရှိ၊ ဟာလက်အား နောက်ယောင်ခံ လိုက်လာသူ ရှိ/မရှိ စစ်ဆေးရန် ဖြစ်သည်။
စားသောက်ဆိုင် ရောက်သွားသော အေးဂျင့်(၂)ယောက်အနက် တစ်ယောက်က အတွင်းသို့ ဝင်သွားပြီး ကျန်တစ်ယောက်က အပြင်တွင်စောင့်ကာ ပတ်ဝန်ကျင် အခြေအနေကို အကဲခတ်သည်။ အတွင်းသို့ ဝင်သွားသည့် အေးဂျင့်က အရေးပေါ် ဖြစ်ပျက်လာပါက ထွက်လမ်းများ ပိတ်ဆို့နေ/မနေ (ဥပမာ နောက်ဖေးတံခါး သော့ခတ်ထားခြင်းမျိုး) စစ်ဆေးသည်။
ဟာလက်သည် အာရပ်တစ်ယောက် ဖြစ်သည့်အပြင် သူသည် မည်သည့်ပြဿနာနှင့် ရင်ဆိုင်နေရသည်ကို မသိသေး။ ထို့ကြောင့် ယခုတွေ့ဆုံမှုသည် အန္တရာယ်ရှိနိုင်သော တွေ့ဆုံမှုအဖြစ် အေးဂျင့်များက သတ်မှတ်သည်။ဟာလက်သည် တုန်တုန်ယင်ယင်ဖြင့် ရောက်လာသည်။ ကြောက်လွန်းအားကြီးသဖြင့် မစင်များပင် ထွက်ကျနေ၍ နံစော်နေသည်။
အေးဂျင့်။ ။“ဘာဖြစ်လာတာလဲ၊ အရင် တစ်နာရီလောက်တုန်းက အကောင်းကြီးပါ”
ဟာလက်။ ။“ကျွန်တော် ဘာလုပ်ရမလဲ မသိတော့ဘူး၊ ဘာလုပ်ရမလဲ မသိတော့ဘူး”
အေးဂျင့်။ ။“ဘာဖြစ်နေတာလဲ၊ စိတ်အေးအေးထားပြီး ပြောစမ်းပါ”
ဟာလက်။ ။“ကျွန်တော့်ကို သတ်ကြတော့မယ်၊ ကျွန်တော် သေရတော့မယ်”
အေးဂျင့်။ ။“ဘယ်သူက သတ်မှာလဲ၊ ရှင်းရှင်းလင်းလင်း ပြောစမ်းပါ”
ဟာလက်။ ။“ခင်ဗျား တစ်ယောက်ပဲ အားကိုးစရာ ရှိတော့တယ်၊ ကျွန်တော့်ကို ကူညီပါ”
အေးဂျင့်။ ။“ကူညီမှာပါ၊ ပြဿနာက ဘာလဲဆိုတာ ပြောမှ ကူညီနိုင်မှာပေါ့”
ဟာလက်။ ။“ကျွန်တော့် ကားလေ၊ ကားအတွက် ပိုက်ဆံတွေ”
အေးဂျင့်။ ။“ခင်ဗျား ရူးနေသလား၊ ညဉ့်နက်သန်းခေါင်ကြီး ကျွန်တော့်ကို ခေါ်ပြီး ကားဝယ်ချင်တယ်လို့ လာပြောနေရတယ်”
ဟာလက်။ ။“မ…မဟုတ်ဘူး၊ ကား…က ရပြီးသားလေ”
အေးဂျင့်။ ။“ဟုတ်ပါပြီ ကားက ဘာဖြစ်လို့လဲ”
ဟာလက်။ ။“ကားဝယ်ဖို့ ငွေကို သံရုံးက မီးခံသေတ္တာထဲက ယူလာတာ၊ မနက်ဖြန် မနက် စာရင်းလာစစ်ကြရင် ငွေတွေ လျော့နေရင် ကျွန်တော့်ကို သတ်ကြတော့မယ်၊ ကျွန်တော့်ကို ငွေကြိုပေးထားပါလား၊ နောက်ပြန်ဆပ်ပါ့မယ်”
အေးဂျင့်။ ။“ကျွန်တော် ခင်ဗျားကို ကူညီမယ်၊ ဒါပေမဲ့ အထက်ကို တိုင်ပင်ရဦးမယ်”
အေးဂျင့်က နောက် အေးဂျင့်တစ်ယောက်ထံ ဖုန်းဆက်ပြီး ဟိုတယ်တိုက်ခန်း တစ်ခန်း ငှားလိုက်သည်။ ဟိုတယ်ခန်းသို့ ရောက်သောအခါ ဟာလက်အား ရေမိုးချိုး သန့်စင်စေသည်။ ဟာလက် ရေချိုးနေစဉ် အေးဂျင့်က လန်ဒန်မြို့ ဌာနခွဲမှူးထံ ဖုန််းဆက်ပြီး အခြေအနေကို ရှင်းပြပြီး ဒေါ်လာ(၁၅ဝဝဝ) အသင့်ရှာထားရန် ပြောသည်။
သာမန်အားဖြင့်ဆိုလျှင် ဒေါ်လာ(၁)သောင်းအထက် သုံးစရိတ်ကို တဲလ်အဗစ်၏ ခွင့်ပြုချက်ယူရမည် ဖြစ်သည်။ သို့သော် ယခုကိစ္စကို အထူးကိစ္စတစ်ရပ်အနေဖြင့် ဌာနခွဲမှူးက ခွင့်ပြုလိုက်သည်။ ဌာနခွဲမှူးသည် ဂျူးလူမျိုး လောင်းကစားရုံ ပိုင်ရှင်ထံ သွားကာ ဒေါ်လာ(၁၅ဝဝဝ) ချေးယူသည်။
ပိုင်ရှင်က ဌာနခွဲမှူးအား ဒေါ်လာ(၃)သောင်း အပိုဆောင်းကာ “မင်းတို့က ငွေ အမြဲလိုနေတယ်။ ပိုပိုသာသာ ယူသာသွား”ဟု ပြောကာ ပေးလိုက်သည်။ လန်ဒန်ဌာနခွဲမှူးသည် အရေးပေါ် ငွေလိုသည့်အခါတိုင်း ထိုဂျူးထံမှ ငွေယူနေကျ ဖြစ်သည်။ ယူပြီးသည့်အခါတိုင်းလည်း ပြန်ဆပ်သည်။
ဟာလက်၏ လက်ထဲတွင် ငွေရလာပြီ ဖြစ်သော်လည်း ထိုငွေကို သံရုံး မီးခံသေတ္တာထဲသို့ မိုးမလင်းမီ မည်သို့ ပြန်ထည့်ရမည်ကို မသိ ဖြစ်နေသည်။ လန်ဒန်မြို့ ဒုတိယဌာနခွဲမှူးသည် တခြား အစီအစဉ်တစ်ခုအတွက် ဆီးရီးယား သံရုံးစောင့်(၂)ဦးကို သိမ်းသွင်းထားခဲ့သည်။ ထိုအစောင့်(၂)ဦးအား မျက်နှာလွှဲခိုင်းပြီး မော့ဆက် ဖောက်ထွင်းဝိဇ္ဇာအဖွဲ့နှင့်အတူ ဟာလက်သည် သံရုံးအတွင်းသို့ ဝင်ရောက်ကာ မီးခံသေတ္တာအတွင်း ငွေကို ပြန်ထားလိုက်သည်။ မီးခံသေတ္တာဖွင့်သော ဂဏန်းတွဲ (conbination)ကို ဟာလက်က သိနေသည့်အတွက် မီးခံသေတ္တာဖွင့်ရာတွင် အခက်အခဲ မရှိပေ။
ဟိုတယ်ခန်းသို့ ပြန်ရောက်လာသည့်အခါ အေးဂျင့်က ဟာလက်အား “ခင်ဗျားကို အခုပေးတဲ့ ဒေါ်လာ(၁၅ဝဝဝ)ဟာ ကြိုတင်ငွေ မဟုတ်ဘူး။ ခင်းဗျားကို ချေးတာပဲ။ ခင်ဗျားရမယ့် ငွေထဲက တစ်လကို (၁)ထောင်နဲ့ (၁၅)လ ဖြတ်သွားမယ်”ဟု ပြောသည်။
ကြိုတင်ငွေအဖြစ် ပေးပါက ဟာလက်သည် မော့ဆက်အား ကူညီနေရသည်ကို စိတ်မပါဘဲ ဖြစ်သွားနိုင်သည်။ “ခင်ဗျားက တန်ဖိုးရှိတဲ့ သတင်းယူလာမယ်ဆိုရင် ဆုကြေးအနေနဲ့ ချေးငွေထဲက ပိုဖြတ်ပေးမယ်။ အဲဒီလိုဆိုရင် ခင်ဗျားဆပ်ရတာ မြန်မြန်ကျေမှာပေါ့။ ဒါပေမဲ့ ခင်ဗျား နောက်ထပ် မဟုတ်တရုတ်တွေ ထပ်လုပ်ရင်တော့ ခင်ဗျားကို ကျွန်တော် ကိုယ်တိုင် သတ်မယ်”ဟု အေးဂျင့်က ပြောလိုက်လေတော့သတည်းးး။ ။
××××××××××××
‘ The End ‘
(Credit to : မူရင်း Post ဆရာ Moshe Dayan , ဆရာတင်နွယ်မောင်၏မော့ဆက်စာအုပ်မှ and Wikipedia…

No comments:

Post a Comment

Note: Only a member of this blog may post a comment.