တက္ကသိုလ်ဝင်စာမေးပွဲ ဖြေဆိုခွင့် လျှောက်လွှ

 

တက္ကသိုလ်ဝင်စာမေးပွဲ ဖြေဆိုခွင့် လျှောက်လွှာနှင့် ကတ်ပြားဖြည့်စွက်ရာတွင် အထူးသတိပြုရမည့် အချက်များ

၂၀၂၄ တက္ကသိုလ်ဝင်စာမေးပွဲ ဖြေဆိုခွင့် လျှောက်ထားရန်အတွက် STEAMS-1 သို့မဟုတ် STEAMS-2 ဘာသာတွဲ ဖြေဆိုမည့်သူများအတွက် အစိမ်းရောင် ဖြေဆိုခွင့် ကတ်ပြားနှင့် လျှောက်လွှာ၊ STAMS-1 သို့မဟုတ် STAMS-2 ဖြေဆိုမည့် သူများအတွက် ပန်းရောင် ဖြေဆိုခွင့်ကတ်ပြားနှင့် လျှောက်လွှာဟူ၍ ခွဲခြားသတ်မှတ်ထားပါသည်။ ဘာသာတွဲ အလိုက်ဖြေဆိုရမည့် ဘာသာရပ်များကို အောက်ပါ Link တွင် ကြည့်နိုင်ပါသည်။

https://www.facebook.com/exams.mm/posts/674070498090483

မိမိတို့ ဖြေဆိုလိုသည့် ဘာသာတွဲအလိုက် မှန်ကန်သည့် ဖြေဆိုခွင့်ကတ်ပြားနှင့် လျှောက်လွှာကို ရွေးချယ်ဖြည့်သွင်းရပါမည်။ လျှောက်လွှာ မဖြည့်သွင်းမီ ကျောဖက်ပါ စည်းကမ်းချက်များကို ဦးစွာ ကြေညက်နားလည်အောင် ဖတ်ရှုစေလိုပါသည်။

ဖြေဆိုခွင့်ကတ်ပြားနှင့် လျှောက်လွှာတွင် ဖြည့်သွင်းရမည့် အချက်အလက်များကို ဖြေဆိုမည့်သူကိုယ်တိုင် ပြည့်စုံမှန်ကန်အောင် အထူးဂရုစိုက် ဖြည့်သွင်းပါ။

အောင်လက်မှတ်ထုတ်ပေးသည့်အခါတွင် ဤဖြေဆိုခွင့် ကတ်ပြားနှင့် လျှောက်လွှာပါ အချက်အလက်များအတိုင်းသာ အတည်ပြု ထုတ်ပေးသဖြင့် မိမိ၏ အချက်အလက်များ မှန်ကန်ကြောင်း သေချာစေရန် အထူး(အထူး) ဂရုပြုကြရပါမည်။

ဖြေဆိုခွင့်ကတ်ပြားနှင့်လျှောက်လွှာပါ အချက်အလက်များကို ကျောင်းအုပ်ကြီးများက ကျောင်းဝင် "ခ"စာရင်းနှင့် တိုက်ဆိုင်စိစစ်ပြီး ထောက်ခံအတည်ပြုရပါသည်။ အကယ်၍ လွဲမှားနေသည့် အချက်အလက်ရှိခဲ့လျင် စာမေးပွဲ မဖြေခင် လုပ်ထုံးလုပ်နည်းနှင့်အညီ ဆောင်ရွက်၍ ချက်ခြင်းပြင်ဆင်ပါ။ (စာမေးပွဲအောင်မြင်ပြီးလျင် မည်သည့် အချက်အလက်ကိုမှ ပြင်ခွင့်မပြုပါ)

လျှောက်ထားသူကာယကံရှင်များသည် အထူးသဖြင့် မိမိအမည်၊ မိဘအမည် စာလုံးပေါင်းများ (မြန်မာ၊ အင်္ဂလိပ်)နှင့် မွေးသက္ကရာဇ်တို့ကို ပြည့်စုံမှန်ကန်ကြောင်း သေချာစေအောင် အထပ်ထပ် စစ်ဆေးပါ။ (အောင်လက်မှတ်အတွက် အင်မတန် အရေးကြီးပါသည်၊ နောင်အခါမှ ပြင်မရပါ)