၂၇ မေ၊ ၂၀၂၄
တောင်ကိုရီးယားနဲ့ တရုတ်နိုင်ငံကြား သံတမန်ရေး၊ လုံခြုံရေးနဲ့ လွတ်လပ်စွာကုန်သွယ်ခွင့် ကိစ္စရပ်တွေကို ဆွေးနွေးကြဖို့ တောင်ကိုရီးယားသမ္မတ Yoon Suk Yeol နဲ့ တရုတ်ဝန်ကြီးချုပ် Li Qiang တို့ မေလ ၂၆ ရက်နေ့မှာ သဘောတူလိုက်ကြောင်း တောင်ကိုရီးယားသမ္မတရုံးက ကြေညာပါတယ်။
ဂျပန်ဝန်ကြီးချုပ် Fumio Kishida တက်ရောက်မယ့် ၄ နှစ်အတွင်း ပထမဆုံးအကြိမ်ကျင်းပတဲ့ ၃ ပွင့်ဆိုင်ဆွေးနွေးပွဲမစခင် တရက်အလိုမှာ အခုလိုသဘောတူလိုက်ကြတာဖြစ်ပါတယ်။ တောင်ကိုရီးယားနဲ့တရုတ် နှစ်နိုင်ငံအကျိုးတူကိစ္စရပ်တွေကို အပြန်အလှန်လေးစားမှုနဲ့ ပူးပေါင်းဆောင်ရွက်သင့်သလို ယူကရိန်း၊ အစ္စရေး-ဟာမတ်စ်စစ်ပွဲနဲ့ ကမ္ဘာလုံးဆိုင်ရာစီးပွားရေးအရ စိန်ခေါ်ချက်တွေကိုလည်း လက်တွဲလုပ်ဆောင်ကြဖို့ သမ္မတ Yoon Suk Yeol က တရုတ်ဝန်ကြီးချုပ်ကို ပြောကြားခဲ့ပါတယ်။
စီးပွါးရေးနဲ့ကုန်သွယ်ရေးကိစ္စရပ်တွေကို နိုင်ငံရေး၊ ဒါမှမဟုတ် လုံခြုံရေးကိစ္စရပ်တွေအဖြစ် ပြောင်းမပစ်ဘဲ တည်ငြိမ်တဲ့ထောက်ပို့ကွင်းဆက်တွေအဖြစ် နှစ်နိုင်ငံပူးပေါင်းဆောင်ရွက်နိုင်အောင် တရုတ်ဝန်ကြီးချုပ်က တောင်ကိုရီးယားသမ္မတကို ပြောဆိုခဲ့တယ်လို့ တရုတ်အစိုးရပိုင် ဆင်ဟွာသတင်းအေဂျင်စီက ပြောပါတယ်။
၂၀၀၈ ခုနှစ်မှာ ပထမဆုံးအကြိမ် ပြုလုပ်ခဲ့တဲ့ ဒီ ၃ နိုင်ငံ တွေ့ဆုံဆွေးနွေးပွဲကို နှစ်စဉ်ကျင်းပသွားကြဖို့ စီစဉ်ခဲ့ကြပေမယ့် အပြန်အလှန်အငြင်းပွါးမှုတွေနဲ့ ကိုဗစ်ကပ်ရောဂါကြောင့် ၂၀၁၉ ခုနှစ် ဒီဇင်ဘာလမှာ နောက်ဆုံးတွေ့ဆုံခဲ့ကြတာပါ။ ခုကျင်းပမယ့် ၃ ပွင့်ဆိုင်ဆွေးနွေးပွဲပြီးရင်တော့ စီးပွါးရေး၊ ကုန်သွယ်ရေး၊ သိပ္ပံနဲ့နည်းပညာ၊ ပြည်သူ့ကျန်းမာရေးနဲ့ တိုးလာတဲ့သက်ကြီးရွယ်အိုလူဦးရေ စတဲ့ကိစ္စရပ်တွေနဲ့ပတ်သက်လို့ Yoon, Li နဲ့ Kishida တို့ကပူးတွဲကြေညာချက်ထုတ်ပြန်မှာဖြစ်တယ်လို့ တောင်ကိုရီးယားအရာရှိတွေက ပြောပါတယ်။
No comments:
Post a Comment
Note: Only a member of this blog may post a comment.