၁၉ မေ၊ ၂၀၂၄
လာမယ့် ရက်သီတင်းပတ် (၃)ပတ်အတွင်းမှာ ဂါဇာစစ်ပွဲနဲ့ပတ်သက်ပြီး အစီအစဉ်သစ် မချမှတ်နိုင်ရင် အစ္စရေးနိုင်ငံရဲ့ အဖွဲ့ဝင်သုံးဦးပါ စစ်ဝန်ကြီးအဖွဲ့ကနေ နုတ်ထွက်မယ်လို့ မျှတတဲ့ နိုင်ငံရေးအမြင်ရှိသူတဦးဖြစ်တဲ့ Benny Gantz က စနေနေ့က ခြိမ်းခြောက်လိုက်ပါတယ်။ ဒါကြောင့် ဝန်ကြီးချုပ် ဘင်ဂျမင် နေတန်ယာဟု Benjamin Netanyahu အတွက် သူ့အစိုးရအဖွဲ့ထဲက လက်ယာစွန်း မဟာမိတ်တွေကို ပိုမို အားကိုးလာရမယ့် အနေအထား ဖြစ်သွားပါတယ်။
ဒါဟာ ဂါဇာစစ်ပွဲ ၇ လ ကြာလာချိန်မှာ ဟားမတ်စ်ဘက်က အောက်တိုဘာ ၇ ရက် တိုက်ခိုက်မှုအတွင်း ဖမ်းသွားတဲ့ ဓားစာခံတွေ ပြန်လွတ်ရေးအပါအဝင် ရည်မှန်းချက်တွေ မပြီးမြောက်သေးတဲ့ အစ္စရေးရဲ့ ခေါင်းဆောင်ပိုင်းအတွင်း အကွဲအပြားတွေ ပိုတိုးလာတာလည်း ဖြစ်ပါတယ်။
ဂန့်ဇ် Gantz က ဓားစာခံတွေ ပြန်လွတ်ရေး၊ ဂါဇာမှာ ဟားမတ်စ် စိုးမိုး အုပ်ချုပ်နေမှုကို အဆုံးသတ်ရေး၊ ဂါဇာကမ်းမြောင်ဒေသတခုလုံးကို စစ်မဲ့ဇုန် အဖြစ်ကြေညာနိုင်ရေးနဲ့ အရပ်သားရေးရာ နိုင်ငံတကာ စီမံခန့်ခွဲရေး အဖွဲ့တခု ထူထောင်ရေးတို့ပါဝင်တဲ့ အချက် (၆)ချက်ပါ အစီအစဉ်ကို အဆိုပြုထားပါတယ်။ ဒါ့အပြင် ဆော်ဒီအာရေးဗီးယားနိုင်ငံနဲ့ ဆက်ဆံရေးပုံမှန်ဖြစ်စေဖို့ ကြိုးပမ်းမှုတွေကိုလည်း ထောက်ခံထားပါတယ်။ ဒီအစီအစဉ်သစ်ကို ဇွန်လ ၈ ရက်နေ့ နောက်ဆုံးထား မထောက်ခံရင် အစိုးရအဖွဲ့ကနေ နုတ်ထွက်မယ်လို့ Gantz က ပြောပါတယ်။
No comments:
Post a Comment
Note: Only a member of this blog may post a comment.